رواية مزكرات وهمية
الفصل الثاني2
بقلم محمود الامين
لقيت الشرطة في وشي مكنتش عارف أتصرف ازاي ؟..واتقبض عليا ولقيت نفسي متهم في قتل الست اللي اسمها ام النور دي ..وعرفت اني هقعد في الحجز لحد ما يعرفوا ام النور دي ماتت ازاي ؟الدنيا كانت سودة في عيني ..يومها قعدت في الحجز وبدأت الذكريات تهاجمني لقيت نفسي بعيط زي العيال الصغيرة وفجأة لقيت واحد كده واقف قدامي كان طول بعرض لابس لبس ريحته وحشه ووشه مليان ندبات واتكلم وقال
_بتعيطي ليه يا بيضة ..هو في حد جيه جنبك ؟
=انا اسمي سيد وبعدين انا حر انت مالك ؟
_انا مالي ..تصدق انك عيل قليل الادب وانا اللي هعلمك الادب ده
ولقيته مسكني من هدومي ونزل فيا ضرب ..محستش بنفسي غير لما فوقت ولقيت نفسي واقع في الارض والحجز كان هوس هوس ..الكل كان نايم ومن التعب والوجع اللي في جسمي نمت انا كمان ومحستش بنفسي وصحيت على صوت باب الحجز بيتفتح وصوت العسكري وهو بينادي عليا ..قومت من مكاني واتحركت معاه لحد ما وصلت مكتب الظابط واللي عرفت ان اسمه ناصر واتكلم وقال
_حظك حلو يا سيد تقرير الطب الشرعي جيه في صفك والست ام النور ماتت موتة طبيعية
=طيب الحمد لله يعني خلاص اقدر دلوقتي اروح
_لسه يا سيد هنقفل المحضر في الاول وبعدين تقدر تروح طبعا
=انا تحت امرك يا باشا
_بس معلش يا سيد انا عندي سؤال
=اكيد يباشا اتفضل
_انتي ايه اللي وداك بيت ام النور ؟..يعني انت راجل شكلك متعلم وعارف ربنا ...ايه مخليك تؤمن بالجهل ده ؟
=انا هحكي لحضرتك كل حاجة بس حاول تصدقني
وبدأت أحكي للظابط كل حاجة حصلت والغريبة انه مكنش مستغرب كلامي خالص ..واتكلم وقال
_بص يا سيد ام النور دي واحدة دجالة كانت بتعمل اسحار للناس وبتأذيهم ومكنتش راحمة لا حي ولا ميت ..ووجودك في بيتها كان عليه علامة استفهام كبيرة عشان كده سألتك السؤال ده
=يعني فعلا هي اللي عملت العمل لصفاء الله يرحمها
_اكيد هي بس اكيد ده مش من نفسها اكيد في حد سلطها تعمل ده ...في حد مش رايد ليك الخير او كان عايز يأذيها لسبب تاني
=انا مش فاهم حاجة
_ من زمان واحنا حاطين عنينا على الست دي وعارفين كل حاجة بتعملها وكنا مستنيين الوقت المناسب عشان نقبض عليها ..هي كانت عاملة نفسها مغسلة اموات وللاسف في ظابط كان هنا اسمه سعيد حب يقبض عليها ومكنش معاه دليل كان بيراقبها ..عارف الظابط ده فين دلوقتي
=فين؟
_في مستشفي المجانين ..عملتله عمل وده لقناه عندها لما قبضنا عليك في شقتها كان وسط اعمال كتير اتعملت لناس واتأذت بيها ناس
بعد ما خلصت كلام مع الظابط مشيت ورجعت على البيت وأول ما وصلت لقيت رحمة كانت مقطعة نفسها من العياط ومكنتش تعرف اللي حصل وطبعا لو حكتلها اللي حصل هتقوم خناقة عشان اللي حصل بسبب تفكيري في صفاء فاضطريت اكدب وألفت حكاية من دماغي عشان اعدي اليوم ..دخلت السرير ورميت جسمي وانا بفكر وبسأل نفسي مين الشخص اللي عمل كده في صفاء مين اللي خلي اخر ايامها عذاب ومستكفاش لا ده كان عاوز يعذبها حتي في قبرها وهي ميتة ؟
مين الشخص اللي بيكرها كده وعنده النقص والجحود ده ؟
فكرت في رحمة بس هي مكنتش تعرف علاقتي بصفاء غير بعد جوازنا بفترة يعني مستحيل تكون هي اللي عملت كده وبعدين رحمة جبانة متعملهاش..دماغي كانت هتنفجر من كتر التفكير وعشان كده حاولت انام وبعد محاولات كتير نمت وصحيت على صوت بينده عليا بأسمي ..أنا عارف الصوت ده كان واحشني ونفسي اسمعه ده صوت صفاء ..فتحت عينيا لقيت نفسي واقف في طريق ضلمة والارض كانت رملة ..الجو كان برد ومش عارف انا فين ؟ لسه سامع صوتها بيقرب مني لحد ما لقيتها واقفة قدامي كان نفسي اخدها في حضني واقولها وحشتيني لكن في اللحظة دي لقيتها بتحط ايدها على كتفي ولقيت نفسي في القبر معاها بس كانت لابسة الكفن وشها متحلل شكلها مفزع صرخت ووقعت على الارض ووقتها شوفت جثة متكفنة كانت جثتي ..جثتي انا
صحيت من النوم على ايد رحمة ..اللي كانت بتبصلي بخوف وقالتلي
_مالك يا سيد ؟..اي اللي بيحصل انت مبقتش طبيعي ؟
=مبقتش طبيعي ايه ؟...هو فين تصرفاتي الغريبة اللي مخلياكي شايفة اني مش طبيعي ممكن افهم ؟
_انت ليك اسبوع من يوم ما رجعت وحكتلي الحكاية الخايبة دي اللي كانت سبب غيابك وانت مش طبيعي كل يوم تصحي تصرخ وتقول كلام غريب وانا خلاص تعبت واعصابي مبقتش متحملة
انا كنت متنح من الصدمة ..اسبوع ايه ؟
=اسبوع ازاي ؟ انا لسه راجع من شوية ونمت
_هنرجع بقي للجنان بتاع كل يوم لا يا حبيبي ..انت راجع بقالك اسبوع صدقني انت كل يوم بتعيد نفس الكلام وانا تعبت وبقولك روح لدكتور نفساني وانت مش عايز تسمع
مكنتش عارف اقولها ايه عاوز اصرخ في وشها واقولها اسكتي ..قومت من مكاني وبصيت على تليفوني وفعلا طلع كلامها صح ..انا ليا اسبوع راجع طب ازاي ؟ انا اتجننت ولا ايه ؟
خرجت من البيت وانا تايه مش عارف انا رايح فين ؟..لقيت رجلي وخداني لقبرها من تاني قعدت قدامه وانا مش فاهم حاجة ..اصل البداية كانت من هنا عاوز افهم ايه اللي حصلي بالظبط..وقتها شوفت نفسي التربي اللي شوفته قبل كده كان جاي ناحيتي قربت منه ولسه هتكلم معاه لقيته بيقولي
_ ايوة يا حضرت خير ..اي خدمة ؟
=انت مش عرفني ؟
_اعرفك منين ؟..انا اول مرة اشوفك
=نعم ؟...حضرتك بتقول ايه ..انا جيت هنا من حوالي اسبوع لما قولتلي علي الاصوات ىاللي بتطلع من القبر ده ولما طلعنا منه السحر
_انا في الحقيقة مش فاكر حاجة من الكلام ده ..بس اؤمر حضرتك عاوز ايه ؟
مكنتش فاهم حاجة سبت الراجل ومشيت ... مش عارف اروح فين ؟..كل الابواب اتقفلت في وشي بس وقتها جتلي فكرة ..طلعت تليفوني واتصلت بأخت صفاء ردت عليا وكانت مستغربة اني بكلمها
_الو ..ازيك يا سيد اخبارك ايه ؟
=الحمدلله
_يا تري ايه سر المكالمة دي ..ده انا ليا فترة مسمعتش صوتك ؟
=فترة ايه ؟...انا لسه مكلمك قريب بأمارة المغسلة اللي اسمها ام النور
اول ما نطقت اسمها ..الخط قطع والجو قلب هو وتراب ..حطيت ايديا على وشي عشان امنع التراب انه يوصلي لكن فجأة فتحت ولقيت نفسي واقف قدام شقة ام النور وكان في صوت جاي من جوه و...
وقفت سيد هنا عشان حسيته بيخرف وقولتله
_ ما تكلمني شوية عن اللي حصل وجابك هنا ؟
رجع سرح في الحيطة وقال
_ أنا بس مش عارف سالم ما بقاش يزورني ليه؟ ده أنا ما ليش غيره في الدنيا، أنا عارف إني غلطت في حقه كتير، بس هو كان لازم يقدّر إن أنا أبوه، ما ينفعش ولد يبجّح في أبوه.
= عم سيد، أنا للمرة المليون بقولك: ابنك مات، وإنت هنا بسبب موته هو ووالدته.
_ إنت هتخليني أندم إني حكيتلك، أنا ابني عايش وبيجي يزورني كمان، ووالدته دي عايشة كمان، وأنا وهي اتطلقنا، بس الولد بار بأبوه.
= يعني إنت مش فاكر يا عم سيد إيه اللي حصل يوم 31 ديسمبر؟
وفي لحظة عم سيد برق وكأنه بيفتكر إيه اللي حصل في اليوم ده، بيفتكر ليلة رأس السنة، افتكر عم سيد منظر الدم وصرخ وهو بيقول: سالم مات، ورحمة ماتت، وأنا فين؟!.. أنا اللي قتلتهم.. أنا اللي قتلتهم
تعليقات
إرسال تعليق
مرحب بكم في مدونة معرض الرويات نتمنه لكم قراء ممتعه اترك5 تعليق ليصلك كل جديد