رواية عودة عزيزالجزء الجزء الرابع4الاخيربقلم محمود الامين

رواية عودة عزيز

الجزء الجزء الرابع4الاخير

بقلم محمود الامين

سمعت صوت صراخ فضلت اقول الو مين معايا؟.. بس اتاكدت ان عم رضا حصله حاجه، خرجت اجري من الجامع والشيخ خرج ورايا.. وكان عمال ينادي عليا ويسالني في ايه؟
قولتله
_ في واحد من اهل البلد كان صاحب ابويا وهو اللي حكالي على اللي حصل، ودلوقتي رقمه رن عليا وسامع صوت صراخ
= طيب انت هتروح فين دلوقتي؟
_ لازم اروحله اكيد حصلت له حاجه
= طيب انا جاي معاك، تعالى معايا انا معايا عربيه
الشيخ كان معايا عربيه صغيره ركبنا فيها واتحركنا على البلد، واول ما وصلنا لقينا البلد كلها متجمعه عند بيت عم رضا، دخلت وسط الناس وانا مش فاهم اي حاجه، وكنت سامع الناس بتقول لا اله الا الله.. قربت من البيت ووقتها شوفت عم رضا ميت.. كان منظره صعب أوي، عينيه كانت مفتوحه على الاخر ومبرق وكان نازل منها دم لونه اسود، واول ما الشيخ شاف منظره اتكلم وقال
_ ده انتقامهم يبني، رضا عرف حاجات ما كانش المفروض يعرفها ومن الواضح انه اتحذر انه ما يحكيش، بس لما حكالك انتقموا منه زي ما انت شايف
= ما لهوش ذنب، هو بس فهمني ايه اللي حصل لابويا
_ شد حيلك، البقاء لله يبني
= سبحان من له الدوام يا عم الشيخ، بس انا عايز افهم عاوز اعرف معنى الكلمه اللي انت قولتها ايه؟
انت قولت اني عايش مع اموات.. معناه ايه الكلام ده؟
_ تعالى معايا يبني مش هينفع الكلام هنا، هنرجع الجامع وهناك هحكيلك كل حاجه
قعدت في البلد لحد ما اتغسلت جثه عم رضا، واتعملت جنازه كبيره والبلد كلها خرجت في الجنازه، الكل كان زعلان على عم رضا وانا كنت زعلان وفي نفس الوقت حاسس بالذنب، حاسس ان كل اللي حصله بسببي، وقفت على قبره بعد ما ادفن ودعيتله، وبعدها مشيت انا والشيخ ركبنا العربيه واتحركنا، ورجعنا تاني على البلد اللي فيها بيت صابره، دخلنا الجامع وقعدنا واتكلم الشيخ وقال
_ انت لحد دلوقتي ما تعرفش اسمي، انا الشيخ صادق شيخ الجامع ومولود هنا في البلد.. احنا زي اي بلد كنا عايشين في حالنا وكل واحد بيروح على شغله وبيرجع على بيته عشان ينام ويستعد لتاني يوم، لحد ما جيه البلد راجل ومراته واللي عرفناه وقتها انهم من ليبيا، استقبلناهم احسن استقبال والراجل كان جاي ومعاه فلوس وطلب مننا نشوفلهم بيت عشان يعيشوا فيه، وفعلا اشتروا البيت وعاشوا فيه، ولحد كده الدنيا كانت تمام.. لكن بعد كده اكتشفنا ان الناس دي ليها في السحر والدجل، والموضوع بدأ لما بدات ناس من البلد تروحلهم وبالذات للست اللي اسمها صابره، والمعظم كانوا ستات واحده مش بتخلف عاوزه تخلف، واحده فاتها سن الجواز وعاوزه تتجوز
طبعاً بدأت انصح الناس ان ده غلط واننا لازم نبعد عن الجهل ده، في ناس سمعت الكلام وفي ناس لا
بس انا كنت فاكر ان الموضوع هيقف هنا، ما كنتش اعرف ان في ناس هتروح عشان تأذي بعضها، وفي يوم الناس صحيت على خبر موت طفل صغير في الترعه اللي على الناحيه التانيه من الطريق، الطفل كان ميت غرقان او ده اللي احنا كنا فاكرينه، لكن الطب الشرعي قال انه في اثار خنق على رقبه الطفل، وبعد التحريات اتقبض على الست فوزيه مرات المعلم عطا الجزار واللي قالت في اعترافاتها انها قتلت الطفل بسبب امه اللي عملتلها عمل عند صابره وقالت شويه كلام جاهل، ان السحر ده حول حياتها وخلت جوزها يكرهها ويبعد عنها
الناس وقتها بدأت تفوق، ووقتها انا جمعت الناس في الجامع واتجمعنا كلنا عشان نطرد الست صابره وجوزها من البلد، طبعا الموضوع ما كانش سهل وجوزها خرج عشان يتخانق معانا وفي وسط الخناقه في واحد اتهور وقتله
ووقتها الست صابره مشيت من البلد وهي بتتوعدلنا بالخراب وقالت انها هترجع وهتنتقم مننا
وفعلا رجعت الست صابره، ومعاها ابوك الحاج فوزي بس اول ما شوفته عرفت ان الجن مسيطر عليه وان الست الملعونه دي
حضرت عليه جن عشان تنتقم مننا
ومن يوم ما رجعت، والبيوت بتولع لوحدها وفي ناس كتير ماتت بسببهم لحد ما قرر واحد اسمه اسامه انه يولع في البيت، وفعلا عمل كده وكنا سامعين صرخاتهم
وجثثهم خرجت قدام عينينا.. وانت النهارده جاي تقولي انك كنت عايش معاهم، يبقى كده الموضوع ما انتهاش
خلص الشيخ كلامه وانا متنح، يعني ايه؟.. ماتوا ازاي يعني؟
_أنا شوفت أبويا واتكلمت معاه، اه شوفت حاجات غريبه في البيت، بس موضوع انهم ميتين ده انا مش قادر اصدقوا
= هو ده اللي حصل، وممكن ترجع البيت وتتاكد بنفسك
خرجت من الجامع وانا مش عارف اروح فين، ارجع البيت فعلاً ولا ابعد وكفايه لحد كده، احساسي بالذنب زاد.. انا السبب في اللي حصل لابويا لو كنت سمعت كلامه من البداية
ما كانش حصل كل ده، وكنت زماني عايش معاه وواخد بالي منه، ولو كان عم رضا ما حكاش الحكايه كان زمانه لسه عايش
كنت حاسس اني لعنه، ولقيت رجلي واخداني ناحيه البيت مش عارف انا رايح ليه ولا هعمل ايه؟
بس اول ما وصلت قدامه.. لقيت البيت محروق، مش عارف ده حصل امتى؟.. ولقيت الشيخ صادق جاي بالعربيه ورايا، كنت لسه هسأله مين اللي عمل في البيت كده؟
لكنه اتكلم وقال
_ البيت كده من ساعه ما الراجل ولع فيه، واضح ان الجن اللي هنا عيشك في الوهم.. انت ما دخلتش البيت ولا عشت فيه كل دي كانت اوهام
= انا ما بقتش فاهم اي حاجه
_ الدايره دي اللي بيدخل فيها، لازم يتوه.. الشيطان موهوب
في خداع البشر، والشيطانة اللي اسمها ناصره قدرت تخدع ابوك لما رجعتله نظره عن طريق السحر
ارجع لربنا يبني، وادعي لابوك ربنا يسامحه ويغفرله.. وجايز لما تقرب من ربنا تلاقي نفسك اللي انت ضيعتها زمان، بس خليك عارف ان اي حاجه بتحصل دلوقتي هي نتيجه افعالك في الماضي.
السلام عليكم، انا الشيخ صادق.. ودي حكايه عزيز، عزيز حاول يعيش حياته بعد ما والده توفى، او بعد ما اتأكد من ده، بعد اخر مقابله بيني وبينه.. عزيز كان رافض يصدق برضو ان والده مات كان مصمم ان كل اللي عاشوا حقيقه، واتهمني اني بضحك عليه
واحساسه بالذنب سيطر عليه، كان شايف ان هو السبب في موت والده وموت رضا.. وللاسف عزيز مشي في سكه غلط، عزيز لجأ هو كمان لطريق السحر، كان فاكر انه يقدر يحضر روح والده واتلم على ناس كانت بتقنعه بالكلام ده
والنهارده روحت عشان حمله تنظيف المقابر من الاعمال والاذيه لكن واحنا بنضف، لقينا جثه عزيز، اقدر اقولكم ان الشخص اللي شاف الجثه وشاف منظر عزيز، اتنقل المستشفى وجتله صدمة عصبية.. منظره كان صعب ومش هقدر اوصفه، وكان لازم نبلغ الشرطة ولسه التحقيقات شغاله
بس انا عايز اقولكم حاجه
الشيطان بيختار الوقت اللي يدخل فيه للانسان ويوسوسله، بيختار الوقت اللي بيكون فيه الانسان ضعيف يائس من رحمه الله عشان يمشي في طريقه
ويا ريت ما ننساش الاية دي
بسم الله الرحمن الرحيم
كَمَثَلِ الشَّيْطَانِ إِذْ قَالَ لِلْإِنسَانِ اكْفُرْ فَلَمَّا كَفَرَ قَالَ إِنِّي بَرِيءٌ مِنْكَ إِنِّي أَخَافُ اللَّهَ رَبَّ الْعَالَمِينَ
صدق الله العظيم

    النهايه

للانتقال إلى باقي الاجزاء وعيش تفاصيل الرواية لحظة بلحظة، اضغط هنا