قصة رونوك الفصل الاول1الاخير بقلم عبد الرحمن

قصة رونوك 

الفصل الاول1الاخير 

بقلم عبد الرحمن

سنة 1587، مجموعة من الرجال والنساء والأطفال من إنجلترا كانوا في رحلة بحرية طويلة محفوفة بالخطر. كانوا 115 شخص، بينهم حرفيين ومزارعين وحتى عائلات كاملة، هدفهم كان بسيط وواضح: بناء مستعمرة جديدة على أراضي "العالم الجديد" في أمريكا، جزيرة صغيرة اسمها رونوك على سواحل كارولينا الشمالية.
المكان كان شكله واعد، أرض خصبة، غابات مليانة خشب، وشاطئ واسع. بنوا بيوت خشبية بسيطة، وحاولوا يزرعوا محاصيل، لكن الصعوبات بدأت من أول يوم. الجو قاسي، الأكل قليل، والعلاقة مع القبائل الأصلية مش دايمًا كانت سلمية.
وقتها الحاكم "جون وايت" قرر إنه لازم يرجع إنجلترا بسرعة عشان يجيب مؤن وأدوات أكتر، كان فاكر إنها مسألة شهور وهيكون راجع. ودّعهم وهو مطمئن إنه هيلحق ينقذهم قبل ما ينهاروا، لكن حصلت المفاجأة!
إنجلترا دخلت في حرب مع إسبانيا، والرحلات البحرية توقفت، واتأجلت عودته وبدل ما يرجع بعد شهور، رجع بعد ثلاث سنين كاملة!
تخيل معايا المشهد. جون وايت واقف على مركبه وهو شايف سواحل رونوك من بعيد، قلبه بيرقص من الفرح، نفسه يشوف عائلته من تاني. لكن وهو بيقرب، المكان كان صامت بشكل مرعب!
مفيش دخان طالع من بيوت!
مفيش أصوات أطفال!
حتى الطيور كانت ساكتة!
نزل من المركب، مشي في الشوارع الترابية اللي كان هو بنفسه ساعد يبنيها. كل البيوت الخشبية فاضية.. شوية منهم متهدم بس مفيش أي علامة على معركة أو قتال!
الأدوات موجودة، الخشب مترصص، وفي حاجات بسيطة الأهالي سايبينها وراهم، كأن الناس اختفوا فجأة من غير ما ياخدوا حاجة معاهم.

الشيء الوحيد اللي لفت نظره كان محفور على عمود كلمة "CRO"، وعلى شجرة قريبة كلمة كاملة: CROATOAN.
جون افتكر على طول إن "كرواتوان" اسم جزيرة قريبة، فافتكر إنهم نقلوا هناك. بس لما راحوا الجزيرة… كانت برضه فاضية. ولا أثر لأي واحد منهم
متخيلين.. 115 إنسان اختفوا من على وش الأرض. لا جثث، لا قبور، لا أي دليل.
من هنا بدأت الكوابيس.
فيه اللي قال إن القبائل الأصلية هاجمتهم وقتلتهم.. لكن لو ده حصل، كانوا على الأقل هيلاقوا آثار معركة!
فيه اللي قال إنهم انضموا لقبيلة محلية واتغيرت حياتهم، لكن مفيش أي دليل يثبت ده.
وفيه اللي راح بعيد وقال إنهم ضاعوا في الغابة، لكن برضه.. مفيش أثر.
مع السنين، كلمة "Croatoan" بقت رمز للغموض!
ظهرت في أحداث تانية غريبة!
المؤرخون بيقولوا إن الكلمة اتلاقت مكتوبة في أماكن ارتبطت باختفاءات غامضة بعد كده!
حتى الكاتب الشهير إدجار آلان بو، اللي كان بيكتب قصص مرعبة، قبل ما يموت بأيام، آخر كلمة كتبها كانت "Croatoan".
الأغرب إن علماء الآثار اللي راحوا الجزيرة بعد قرون لقوا حاجات متناقضة!
لقوا أدوات إنجليزية مدفونة وسط أماكن بتخص قبائل محلية، كأن فيه اندماج حصل، لكن مفيش أي جثث أو دليل على حياة طبيعية استمرت.
تخيل معايا فكرة إن 115 شخص، بأطفالهم ونسائهم ورجالهم، يختفوا من غير أي سبب ولا أي أثر، كأن الأرض ابتلعتهم. فيه ناس بتقول إنهم وقعوا ضحية مرض غامض، فيه اللي قال إنهم اتخطفوا في طقوس روحية، وفيه أساطير بتقول إن الجزيرة نفسها ملعونة، وإن اللي يعيش فيها مصيره الاختفاء.

النهاردة، جزيرة رونوك مكان مهجور، مجرد غابة صامتة بس اللي يزورها بالليل بيحكي عن أصوات غريبة، كأن في حد بيتكلم من بعيد، وأحيانًا أصوات أطفال بتضحك وسط الضلمة!
وفيه ناس بيقولوا إنهم شافوا ظلال بتمشي بين الأشجار، كأن سكان المستعمرة لسه موجودين محبوسين في زمن تاني.
الغموض لسه قائم، والعلماء لحد النهاردة بيحاولوا يلاقوا إجابة، لكن الحقيقة إن مستعمرة رونوك واحدة من أعمق وأرعب الألغاز في التاريخ!

   النهاية